O...

O dous regars, o yeux pleins de beauté,
Petits jardins, pleins de fleurs amoureuses,
Ou sont d'Amour les flesches dangereuses,
Tant à vous voir mon oeil s'est arresté !

O coeur felon, o rude cruauté,
Tant tu me tiens de façons rigoureuses,
Tant j'ay coulé de larmes langoureuses,
Sentant l'ardeur de mon coeur tourmenté !

Doncques, mes yeus, tant de plaisir avez,
Tant de bons tours par ces yeux recevez:
Mais toy, mon coeur, plus les vois s'y complaire,

Plus tu languiz, plus en a des soucis,
Or devinez si je suis aise aussi,
Sentant mon oeil estre à mon coeur contraire.

Sonnet XI, Louise Labé, in Oeuvres complètes, p.127, Garnier Flammarion.